بەرپرسانی شاری ئۆدێسای ئۆکرانیا دەڵێن ڕووسیا لە ڕێی فڕۆکەی بێفڕۆکەوانی ئێرانیەوە هێرشی کردۆتە سەر دوو دامەزراوەی وزەی شارەکە و سەرجەم ئەو ژێرخانانەی شارەکە کە هەستیار نین کارەبایان نەماوە، ئاماژەشیان بەوەدا هێرشەکە کاریگەریی لەسەر ناوچەکانی دەوروبەری شارەکەش هەبوو.
سەرۆکی شارەوانی ئۆدێسا گینادی تروخانۆڤ وتی " بەهۆی فراوانی زیانەکەوە سەرجەم بەکارهێنەران لە ئۆدێسا جگە لە ژێرخانە هەستیارەکان کارەبایان نەماوە."
ئۆفیسی داواکاری گشتی ئۆکرانیا وتی دوو دامەزراوەی وزە لە هەرێمی ئۆدێسا بە فڕۆکەی بێفڕۆکەوانی شاهید – 136 ی ئێرانی لێیان دراوە.
هێزە چەکدارەکانی ئۆکرانیا وتی 15 فڕۆکەی بێفڕۆکەوانی لەوجۆرە کە دەتوانن تەقەمەنی هەڵبگرن و بەرەو ئامانجەکانیان دەفڕن، هەڵدراون بۆ ئامانجەکانی هەرێمەکانی ئۆدێسا و میکۆلایڤی باشوور، 10 فڕۆکەیان خراونەتە خوارەوە.
شاری ئۆدێسا پێش داگیرکارییەکەی ڕووسیا زیاتر لە 1 ملیۆن دانیشتووی هەبووە.
بەڕێوبەرایەتی شارەکە وتی هێرشەکانی ڕووسیا هێڵە سەرەکییەکانی گواستنەوە و کەلوپەلەکانی هەرێمی ئۆدێسایان کردۆتە ئامانج.
فەرمانڕەوای هەرێمی ئۆدێسا ماکزیم مارچینکۆ وتی ڕووسیا فڕۆکەی بێفڕۆکەوانی کامیکازی بەکارهێناوە، کە بەرەو ئامانجەکەیان دەفڕن و لەگەڵ بەرکەوتنیاندا بە ئامانجەکانیان دەتەقنەوە، وتیشی دووان لەو فڕۆکانە بەسەر دەریای ڕەشەوە خراونەتە خوارەوە.
وتیشی " لە ئەنجامی هێرشەکەدا زۆربەی ناوچە و کۆمەڵگەکانی هەرێمەکەمان کارەبایان نەماوە."
لە مانگی 10 ەوە ڕووسیا لە ڕێی فڕۆکەی بێفڕۆکەوان و موشەکەوە ژێرخانی وزەی ئۆکرانیا دەکاتە ئامانج، ڕۆژی هەینی کیێڤ دانی بەوەدانا کە سەرجەم وێستگەکانی کارەبای ثێرماڵ و هایدرۆئەلیکتریکی وڵاتەکە زیانییان بەرکەوتووە.
ئۆکرانیا دەڵێت هێرشەکان کاریگەرییەکی ڕووخێنەرییان هەبووە لەسەر ژیانی هاوڵاتیانی مەدەنی و تاوانی جەنگن، مۆسکۆش دەڵێت هێرشەکانی ڕەوان.
ئۆکرانیا دەڵێت ڕووسیا سەدان فڕۆکەی بێفڕۆکەوانی شاهید – 135 ی ئێرانی دژی ئۆکرانیا بەکارهێناوە، هاوکات داوای سزای توندتری نێودەوڵەتی کردووە دژی ئێران.
سەرچاوە/ ڕۆیتەرز
