دوابه‌دوای ئه‌و رووداوانه‌ی كه له چه‌ند رۆژی رابردوودا، هه‌رێمی كوردستان‌و شاری سلێمانی به تایبه‌ت گرته‌وه، له ڕۆژی دووشه‌ممه به مه‌به‌ستی هێوركردنه‌وه‌ی بارودۆخه‌كه و باسكردن له ڕه‌وشی كوردستان و راوێژكردن به یه‌كتری و ئاڵوگۆڕكردنی بیروبۆچوونه‌كان گفتوگۆ له نێوان سه‌رجه‌م حزب‌و لایه‌نه سیاسییه‌كانی كوردستاندا له ته‌لاری ئه‌نجومه‌نی وه‌زیران هه‌رێمی کوردستان ئه‌نجامدرا. لایه‌نه‌کان بریتی بوون له یه‌كێتیی نیشتمانیی كوردستان و پارتی دیموكراتی كوردستان و یه‌كگرتووی ئیسلامی كوردستان و بزوتنه‌وه‌ی گۆڕان و كۆمه‌ڵی ئیسلامی . بڕیاره دوو باره لایه‌نه سه‌ره‌کیه سیاسیه‌کان له ماوه‌ی چه‌ند ڕۆژی داهاتوودا دابنیشنه‌وه بۆ تاووتێکردنی چاره‌سه‌رێك بۆ بارودۆخه‌که.
جێ ئاماژه پێکردنه له ماوه‌ی 5 رۆژی خۆپیشاندان و ناڕه‌زاییه‌كانی جه‌ماوه‌ری له شاری سلێمانی، 3 که‌س كوژراون و 123 که‌سیش برینداربوون.
سالار مه‌حمود ئه‌ندامی په‌رله‌مانی کوردستان له میانه‌ی گفتوگۆیه‌ك له‌گه‌ڵ هاوکارمان شایان پاشا گوتی جێی نیگه‌رانییه که ئه‌و ڕه‌وشه گه‌یشته ئاستی خۆێن ڕشتن و خه‌ڵکێکی زۆری تێدا شه‌هید و برینداربوون، واته هێشتا گیانی لێبوردن و گه‌شه‌دانی پرینسیـپی دیمو‌کراسی و گیانی نا توندوتیژی لای ئێمه هێشتا کاڵه، بۆیه پێویستی به شۆڕکردنه‌وه‌ی ئه‌و پرینسیپانه هه‌یه بۆ ته‌واوی چه‌مکه‌کانی کۆمه‌ڵگای ئێمه له بواره جیاجیاکان. و ئومێدی کرد که هه‌موو ته‌نگه‌ژه‌کان که هه‌ن له‌سه‌ر مێزی گفتوگۆ یه‌کلابکرێته‌وه.
ده‌توانن له ڕێی کلیککردنی ئه‌و فایله ده‌نگیانه‌ی سه‌ره‌وه‌ی ده‌سته چه‌پ گوێبیستی ته‌واوی گفت و گۆکه بن که ماوه‌که‌ی 7:47 خوله‌که.