پۆلیس دەڵێت بەهۆی شەڕە تەقەیەکەوە لە بانکێکی کەنەدا پۆلیس دوو چەکداری کوشتووە و شەش ئەفسەری پۆلیسیش برینداربوون، هەروەها ماڵەکانی نزیک بانکەکەش چۆڵکراون، ئەوەش بەهۆی ئەوەی گومان دەکرێت ئامێرێکی تەقینەوە لە شوێنەکەدا هەبێت.
پۆلیس دەڵێت کاتژمێر 11 ی بەیانی بە کاتی وڵاتەکە ئەندامانی تیمی کاردانەوەی بەپەلە گەیشتوونەتە بانکی مۆنتێڕیاڵ لە سانیچ لەسەر دورگەی ڤانکوڤەر.
پۆلیسی سانیچ گوتی " ئەمە ڕووداوێکی پۆلیسە و ژمارەیەکی زۆر لە ئەفسەرانی پۆلیس لە ناوچەکەدان."
گوتیشی " بەهۆی ئەگەری بوونی ئامێرێکی تەقینەوەوە لە ناو ئوتومبێلەکەی گومانلێکراوەکاندا، ماڵ و شوێنکارەکانی نزیک لە شوێنی ڕووداوەکە چۆڵکراون."
دواتر پۆلیس گوتی شەقامی بانکەکەیان گرتووە و هۆکارەکەشی گەڕاندەوە بۆ ئەگەری هەبوونی بۆمبێک لە ناوچەکەدا.
سەرۆکی پۆلیسی سانیچ دیین دوثی بە ڕۆژنامەنووسانی وت گومانلێکراوەکان " چەکی تەواوییان پێبووە " و ڕاپۆرتە سەرەتاییەکان ئاماژە بەوە دەدەن قەڵغانیشیان بەستبووبێت.
گوتیشی شەش ئەفسەری پۆلیس بە فیشەک بریندار کراون و گواستراونەتەوە بۆ نەخۆشخانە، هەندێکیان بەمزووانە لە نەخۆشخانە دەردەکرێن بەڵام ئەوانی دیکە " برینەکانیان زۆر سەختە و نەشتەرگەرییان بۆ دەکرێت."
دوثی گوتی " ئەوەندەی من بزانم سەبارەت بەم دیمەنە ئاژاوەگێڕ و تراژیدی و داینامیکی و توندوتیژە، ئەو ڕاستییەی کە هیچ هاوڵاتیەکی مەدەنی بە هیچ شێوەیەک لە شێوەکان زیانیان بەرنەکەوتووە، بەڕاستی سەرسوڕهێنەرە."
سەرچاوە/ ڕۆیتەرز
