سێ ئۆتۆمبیلی بۆمبڕێژکراو لە یەک کاتدا لە شاری تەل تەمری پارێزگای حەسەکە لە ڕۆژئاوای کوردستان تەقیونەتەوە و لە ئاکامدا بە لایەنی کەم 15 کەس گیانیان لەدەسـتداوە و ژمارەیەک زۆر خەڵکیش برینداربوون.
له شارۆچکه‌ی تربه سپی نزیک قامیشلوش ته‌قینه‌وه‌یه‌ک بووه، به‌ڵام هێشتا زیانه‌کانی نه‌زانراوه.
دانیشتوانی ته‌ل ته‌مر بە دەنگی ئەمەریکایان گوت تەقینەوەکان لە کاژمێر 6 ی ئێوارەی ئەمڕۆ پـێـنجشەممە بوون. یەک لە تەقینەوەکان نەخۆشخانەی شارەکەی کردووەتە ئامانج، بۆیە هەموو بریندارەکان ڕەوانەی نەخۆشـخانەکانی سەری کانی و درباسیـیە کراون. دوو ته‌قینه‌وه‌که‌ی دیکه له شه‌قامی گشتی شاره‌که بوون.
ته‌رمی 5 که‌س گه‌یشتوونه‌ته نه‌خۆشخانه‌ی سه‌ری کانی له‌گه‌ڵ 32 بریندار که زۆربه‌یان ژن و منداڵن. یه‌ک له برینداره‌کان کچێکی 14 سـاڵه و قاچێـکی په‌ڕیوه.
مزگەوتەکانی سەری کانی لە بڵندگۆکانیانەوە داوایان لە هاوڵاتیان کرد خوێن بۆ بریندارەکان ببەخشن.
ڕۆژنامەوان فەرهاد شامی بە دەنگی ئەمەریکای گوت هێزەکانی ئاسایش هەموو ئەو ڕێگە و جادانەیان گرتووە کە بەرەو تەل تەمر دەچن و ناهێڵن هیچ ئۆتۆمبیلێـکی بارهەڵگر بەرەو شارەکە بچێت، چونکە مەترسی هەیە لە نێویاندا ئۆتۆمبیلی بۆمبڕێژکراو هەبن.
Your browser doesn’t support HTML5
ڕاپـۆرتی زانا عومەر
وێنه‌ی ژماره‌یه‌ک بریندار له نه‌خۆشخانه‌ی سه‌ری کانی