بەڕیتانیا دەڵێت سەربازانی ئەلیکترۆنی ڕووسیا ڕابەرانی بیانی دەکەنە ئامانج

بەپێی توێژینەوەیەک کە لەلایەن بەڕیتانیاوە پشتیوانی لێکراوە، " سەربازانی ئەلیکترۆنی ڕووسیا " هێرشێکی نوێیان کردۆتە سەر ڕابەرانی بیانی جیهان، لەڕێی هەڵمەتێکی بەرفراوانی بڵاوکردنەوەی زانیاریی نادروستەوە تۆڕە کۆمەڵایەتییەکانیان کردۆتە ئامانج و هەوڵ دەدەن داگیرکارییەکەی ڕووسیا لە ئۆکرانیا وەکو کارێکی ڕەوا پیشان بکەن.

ئۆفیسی دەرەوەی بەڕیتانیا وتی کۆمەڵێک کەس پارەیان پێدراوە و لە کارگەیەک لە سەینت پیتەرسبێرگی ڕووسی کاردەکەن و بەرنامەی نامە ناردنی تێلیگرام بەکاردەهێنن بۆ دامەزراندنی خەڵکی زیاتر و بەکارهێنانیان بۆ بڵاوکردنەوەی زانیاریی نادروست لە هەژمارەکانی ڕاگەیاندنەکانی دژ بە کرێملندا، هەروەها بەکارییان دەهێنن بۆ نوسینی کۆمێنتی پشتیوانیکردن لە سەرۆکی ڕووسیا ڤلادیمیر پوتن و جەنگەکەی لە ئۆکرانیا.

کارگەکە کە بە کارگەی دروستکردنی زانیاری نادروست ناوبراوە، پەرەی بە تەکنیکی نوێ داوە تاوەکو خۆیان بەدووربگرن لە قەدەغەکردنیان لەلایەن کۆمپانیاکانی تۆڕە کۆمەڵایەتییەکانەوە.

ئۆفیسەکەی بەڕیتانیا وتی کۆمێنت دەنووسن و بابەتی پشتیوانیکردن لە کرێملن بڵاودەکەنەوە کە لەلایەن بەکارهێنەرە ڕاستەقینەکانەوە نوسراون وەک لەوەی خۆیان نوسیبێتیانن. شوێنەواری ئەم چالاکییانە لە شەش تۆڕی کۆمەڵایەتی بیندراوە، لەوانەش تێلیگرام و تویتەر و فەیسبووک و تیک تۆک.

ئۆفیسەکە وتی ئەم کارەیان سیاسییەکان و هاوڵاتیانی ئاسایییان لە سەرانسەری جیهان کردۆتە ئامانج، لەوانەش بەڕیتانیا و ئەفریقای باشوور و هیندستان. وتیشی باوەڕوایە پەیوەندییان بە یەڤجینی پریگۆزینەوە هەبێت کە لەلایەن ئەمەریکا و بەڕیتانیاوە سزای بەسەردا سەپێندراوە، ئەوەش بەهۆی ئەوەوە کە لەڕێی ئۆنلاینەوە پشتیوانی دارایی لە ئەرکەکانی کرێملن کردووە.

وەزیری دەرەوەی بەڕیتانیا لیز تڕەس وتی " ناتوانین ڕێگە بە کرێملن و کێڵگەکانی دروستکردنی زانیاریی ساختە بدەین بە درۆکانیان سەبارەت بە جەنگە نایاساییەکەی پوتن، ئەو بۆشاییەی هەمانە لە ئۆنلاین داگیریبکەن. حکومەتی بەڕیتانیا هاوبەشە نێودەوڵەتییەکانی ئاگادارکردۆتەوە و بەردەوام دەبێت لە کارکردن لە نزیکەوە لەگەڵ هاوپەیمانان و تۆڕە کۆمەڵایەتییەکاندا تاوەکو ئەرکەکانی بڵاوکردنەوەی زانیاریی ڕووسیا نەهێڵێت."

سەرچاوە/ دەنگی ئەمەریکا