ئەمەریکا سزا دەسەپێنێت بەسەر گروپێکی نیشتەجێبووە ئیسڕائیلییەکانی کەناری ڕۆژئاوا لەسەر توندوتیژییەکان دژی فەلەستینییەکان

ڕۆژی سێشەممە ئەمەریکا سزای سەپاند بەسەر گروپی هیڵتۆپ یوثدا کە گروپێکن لە نیشتەجێیە ئیسڕائیلییە توندڕەوەکان لە کەناری ڕۆژئاوا و هێرش دەکەنە سەر فەلەستینییەکان و موڵکەکانییان.

وەزارەتی دەرەوەی ئەمەریکا لەگەڵ ئەوەشدا سزای دیبلۆماسی سەپاند بەسەر دوو نیشتەجێی ئیسڕائیلیدا، ئیتان یەردەنی و ئاڤیچای سویسا. یەردەنی پەیوەندی هەبووە بە توندوتیژییەکانەوە دژی هاووڵاتیانی مەدەنی لە کەناری ڕۆژئاوا، سویساش سەرکردەی گروپی هاشومەر یوشە، گروپەکە سزا دراوە و خۆبەخشە گەنجەکان دەهێنێت و لە کێڵگەکانی سەرانسەری ناوچەکەدا نیشتەجێیان دەکات. گروپەکانی مافەکانی مرۆڤیش دەڵێن ئەوانە هاندەری سەرەکی توندوتیژییەکانن لە سەرانسەری ناوچەکەدا.

سزاکان کە سڕکردنی سەرمایەکانیان و قەدەغەکردنی گەشتکردنییان دەگرێتەوە، لە کاتێکدایە کە توندوتیژییەکان دژی فەلەستینییەکان لە کەناری ڕۆژئاوا لە دوای جەنگەکەی ناو غەززەوە زیاتر بوون.

فەلەستینییەکان باس لەوە دەکەن کە بە قسە و جەستەش بێزار دەکرێن و هاتووچۆیان سنووردار کراوە، هەروەها ڕووبەڕووی هەڕەشەی نیشتەجێیەکان دەبنەوە کە بە ماتۆڕ و ئوتومبێل و ئەسپەوە بە دەوروبەری موڵکەکانیاندا دەخولێنەوە.

وەزارەتی خەزێنەی ئەمەریکا وتی گروپی هیڵتۆپ یوث کوشتنی بە کۆمەڵی ئەنجام داوە، هاوکات گروپەکانی مافەکانی مرۆڤ و فەلەستینییەکان دەڵێن گروپەکە لە پشت هێرشەکانی سەر گوندە فەلەستینییەکانەوەن.

هیڵتۆپ یوث پێشتر لەلایەن بەڕیتانیا و یەکێتی ئەوروپاشەوە سزا دراوە.

برادلی سمیثی جێگری وەزیری خەزێنەی ئەمەریکا بۆ کاروباری تیرۆر و هەواڵگری دارایی وتی ئەمەریکا " بەردەوام دەبێت لە لێپێچینەوە لەو کەس و لایەن و ڕێکخراوانەی کە کارئاسانی دەکەن بۆ ئەم کارە ڕق و کینە و ناسەقامگیرکارانە."

وتەبێژی وەزارەتی دەرەوەی ئەمەریکا ماثیو میڵەر وتی " کارەکانی ئەم کەسانە یارمەتیدەر بوون لە دروستکردنی ژینگەیەکدا کە توندوتیژی و ناسەقامگیری تێیدا پەرەدەسەنن. کارەکانییان بە کۆمەڵ و لەسەر ئاستی تاکیش ئاشتی و سەقامگیری و ئاسایشی کەناری ڕۆژئاوا دەخەنە مەترسییەوە."

سەرچاوە/ دەنگی ئەمەریکا