پەرلەمانتارێکی فراکسیۆنی پارتی لە پەرلەمانی عێراق ڕایدەگەیەنێت، هەرێمی کوردستان دەیەوێت لەسەر دۆسیەی نەوت لەگەڵ بەغدا ڕێکبکەوێت و ئیرادەیەکی جدی بۆ ڕێککەوتن لای هەرێم و بەغدا دروستبووە، جەخت لەسەر ئەوەشدەکاتەوە سەردانە چاوەڕوانکراوەکەی وەفدی هەرێم بۆ بەغدا، بۆ گفتووگۆکردنە لەسەر میکانیزمی جێبەجێکردنی ڕێککەوتنی نێوان هەولێر و بەغدا.
لەم گفتووگۆیەدا لەگەڵ دەنگی ئەمەریکا، شوان محەمەد رۆستەم پەرلەمانتاری فراکسیۆنی عێراقی پارتی، لەبارەی سەردانی وەفدی هەرێم بۆ بەغدا، دەڵێت"ڕێککەوتنی تازە لە نێوان هەولێر و بەغدا پێویست نییە، چونکە پێشتر ڕێککەوتن کراوە و دەکرێ لەسەر وردەکاری و میکانیزمی جێبەجێکردنی ڕێککەوتنەکە، وەفدی هەردوولا گفتووگۆ بکەن، بەتایبەت ڕێککەوتنەکە چوارچێوەی یاسایی وەرگرتووە و لەپەرلەمان دەنگی لەسەر دراوە."
وتیشی"مادەی 140، بودجە، یاسای نەوت و گاز، رێککەوتنامەی شەنگال، ڕێککەوتنییان لەسەر کراوە، ماوەتەوە لەسەر وردەکارییەکان ڕێککەوتن بکرێت، بۆیە وەفدی هەرێم و بەغدا، لەسەر میکانیزمی جێبەجێکردن و چوونە بواری ڕێککەوتنەکە، پێویستە گفتووگۆ بکەن."
دەربارەی ئەوەی چی گەرەنتییەک هەیە، بەغدا ناوەڕۆکی ڕێککەوتنەکانی لەگەڵ هەرێم جێبەجێ بکات، شوان محەمەد وتی"بابەتەکە لەسەرەتادایە، ئێمە لە ڕابردوودا ماران گەستە بووین، هێندە ڕێککەوتن کراوە و بەغدا جێبەجێی نەکردووە، متمانە نەماوە، بەڵام ئەمە سەرەتایەکی تازەیە و شیاع سودانی وەکو شەخس کۆمەڵێک بەڵێنی داوە، چوارچێوەی هەماهەنگیش بەڵێنیان داوە، ئینجا هاوپەیمانێتی بەڕێوەبردنی دەوڵەتیش، هاوپەیمانێتییەکی تازەیە و دەتوانێت کێشەکان چارەسەر بکات."
جەختیشیکردەوە، "سەرباری بێ متمانەیی، بەڵام شیاع سودانی ئەوەی لێدەخوێنرێتەوە کە ئیرادەی بۆ چارەسەرکردنی کێشەکان لەگەڵ هەرێم هەبێت، چونکە ئەو پێیوایە مانەوەی کێشەی نێوان هەولێر و بەغدا کابینەکەی شکست پێ دەهێنێت، هەروەها لەڕووی نێودەوڵەتیشەوە کابینەکەی لەکەدار دەکات."
بڕیارە وەفدی هەرێم داواکاری پێدانی 14%ی بودجە ڕادەستی عێراق بکات، بەڵام شوان محەمەد دەڵێت"دەبێت لەچوارچێوەی پرۆژە یاسای بودجەی ساڵی 2023 ڕێککەوتن بکرێ، پێموانییە بەغدا لەسەر ئەو ڕێژەیە ڕازی بێت، چونکە ئێمە هەندێک گرێبەستمان هەیە و ئەو گرێبەستانە پابەندبوونی دارایی قورسیان تێدایە، بەغدا ناچێتە ژێر باری ئەو پابەندبوونانەی هەرێم، کێڵگەی نەوتی گەورە هەیە، حکومەتی هەرێم پارەی نەداوەتە کۆمپانیای نەوتی، بەڵکو کۆمپانیا لە داهاتەکەی و مانگانە پارە دەبات، گەر دۆسیەی نەوت بخەیتە دەست بەغدا، کێ پارەی کۆمپانیا بدات، حکومەتی عێراقیش ئەمە دەزانێت، مەسەلەکان وردەکارییان هەیە و دەبێت لەسەریان ڕێککەوتن بکرێت."
وتیشی"حکومەتی هەرێم نیەتێکی راستگۆیانەی هەیە بۆ ڕێککەوتن لەگەڵ بەغدا لەسەر دۆسیەی نەوت، نرخی نەوت لەسەر ئاستی دنیا بەرز بووەتەوە، گەر هەرێم و بەغدا ڕێکبکەون، 14%ی پشکە بودجە بدرێتە هەرێم، هەرێم، دەتوانرێت کوردستان ببوژێنێتەوە ، بۆیە هەرێم و بەغدا گەیشتوونەتە ئەو بڕوایەی سەرکەوتنی پرۆسەی حوکمڕانی لە ڕێککەوتندایە.
