حکومەت سوریا ڕایگەیاند، بەهۆی بوولەرزەکەی ڕۆژی دووشەممە هەزار و 444 کەس لە سەرانسەری سوریا گیانیان لەدەستدا، هاوکات لانیکەم سێ هەزار و 411 کەس برینداربوون.
ئەم ژمارە نوێیە کۆی گشتی گیانلەدەستدان لە هەردوو وڵات بۆ لانیکەم سێ هەزار و 823 کەس بەرزکردەوە، دوای ئەوەی تورکیا پێشتر پێداچوونەوەی بە ژمارەی مردووەکانیدا کرد، و گەیشتە 2 هەزار و 379 کەس.
ئەنقەرە درەنگانی ڕۆژی دووشەممە ڕایگەیاند، نزیکەی 14 هەزار و 500 کەس برینداربوون و 4900 باڵەخانە تەخت بوون، هاوکات حەوت ڕۆژ ماتەمینی بۆ مردووەکان ڕاگەیاند.
پەیمانگای جیۆلۆجی دانیمارک ڕایگەیاندووە، دوای نزیکەی هەشت خولەک لە بوومەلەرزە سەرەکییەکە کە تورکیای گرتەوە، بومەلەرزەکان گەیشتووەتە کەنارەکانی ڕۆژهەڵاتی گرینلاند.
تورکیا لە یەکێک لە چالاکترین ناوچەکانی بومەلەرزە لە جیهاندایە. دوایین بوومەلەرزەی ئەم وڵاتە بە گوڕی 7.8 پلە لە ساڵی 1939 دا بوو، لەو کاتەدا 33 هەزار کەس لە پارێزگای ئەرزینجانی ڕۆژهەڵاتی ئەو وڵاتە گیانیان لەدەستدا.
ناوچەی دوزجەی تورکیا لە ساڵی 1999 دا بوومەلەرزەیەک بە گوڕی 7.4 پلە ڕوویدا و زیاتر لە 17 هەزار کەس گیانیان لەدەستدا.
پاشنیوەڕۆی ڕۆژی دووشەممە سەرۆکی ئەمەریکا جۆو بایدن پەیوەندییەکی تەلەفۆنی لەگەڵ ڕەجەب تەیب ئەردۆغان سەرۆک کۆماری تورکیاوە ئەنجامدا، کە ئامادەیی ئەمەریکای دووپاتکردەوە بۆ پێشکەشکردنی هەر هاوکارییەکی پێویست بۆ تورکیا. سەرۆک بایدن بە ناوی گەلی ئەمەریکاوە سەرەخۆشی لەو کەسانە کرد کە لە بوومەلەرزەکاندا بریندار بوون یان ئازیزانیان لەدەستداوە.
کۆشکی سپی لە بەیاننامەیەکدا وتی: سەرۆک بایدن ئامادەیی ئەمەریکای دووپاتکردەوە بۆ پێشکەشکردنی هەر هاوکاری و هەموو هاوکارییەکی پێویست بۆ تورکیای هاوپەیمانی ناتۆمان لە بەرامبەر ئەم کارەساتەدا.سەرۆک بایدن ئاماژەی بەوەشکرد، تیمەکانی ئەمەریکا بە خێرایی جێگیر دەبن بۆ پشتگیریکردن لە هەوڵەکانی گەڕان و ڕزگارکردنی تورکیا و هەماهەنگیکردنی هاوکارییەکانی دیکە کە ڕەنگە پێویستیان بەو کەسانە هەبێت کە بەهۆی بوومەلەرزەکەوە زیانیان بەرکەوتووە، لەوانەش خزمەتگوزارییە تەندروستییەکان یان کەلوپەلی سەرەتایی فریاگوزاری.
.
وەزیری دەرەوەی ئەمەریکا ئەنتۆنی بلینکن ڕۆژی دووشەممە پەیوەندی تەلەفۆنی لەگەڵ وەزیری دەرەوەی تورکیا سازداوە. لەو پەیوەندییەدا وێڕای هاوخەمی دەربڕین بەهۆی بوومەلەرزەکانی کە هەزاران کەسی تیادا بوون بە قوربانی جەختیشی لە پابەندبوونی ئەمەریکا کردەوە بۆ هاوکاریکردنی تورکیای هاوپەیمانی ناتۆ.
ئەنتۆنی بلینکن لە تویتێکدا ڕایگەیاند " پەیوەندییەکی تەلەفۆنی گرنگم لەگەڵ وەزیری دەرەوەی تورکیا مەولود چاوش ئۆغڵو ئەنجام دا سەبارەت بە بومەلەرزە وێرانکەرەکان. ئێمە لەگەڵ توکیادا هاوئاهەنگی دەکەین بۆ ئەوەی لەدەستماندایە ئەنجامی بدەین لە تورکیا و سوریا."
بە پێی نوێترین زانیاری ژمارەی قوربانیان بەهۆی بوومەلەرزەکە لە تورکیا و سوریا زیادی کردووە و گەیشتووەتە زیاتر لە 3 هەزار و 800 کەس.
کاربەدەستان لە تورکیا دەڵێن بەلایەنی کەم 2 هەزار و 300 کەس گیانیان لەدەستداوە لە کاتێکدا لە سوریاش بەلارینی کەم هەزار و 444 کەس گیانیان لەدەستداوە. ئەمەش لە کاتێکدایە تیمەکانی بەهاناچوون بەردەوامن لە گەڕان بەدوای قوربانیان لە ژێر داروپەردوی باڵەخانە ڕووخاوەکاندا.
کۆمێنتی خۆت لە ڕێگەی فەیسبوکەوە بنووسە