هەواڵ و زانیارییەکانی پێشتر لە بارەی ئاکامی بومەلەرزەکانی تورکیا لەم لینکەدایە:
https://www.dengiamerika.com/a/6950008.html
کاربەدەستان لە تورکیا و سوریا ئەمڕۆ سێشەممە ژمارەی نوێیان لە بارەی قوربانیانی بومەلەرزەکانی تورکیا ڕاگەیاند.
بەپێی فوئاد ئۆکتای جێگری سەرۆکی تورکیا ژمارەی گیان لە دەستدان لە تورکیا گەیشتە 3419 کەس و زیاتر لە 20 هەزار کەسی دیکە برینداربوون.
لە سوریاش، وەزارەتی تەندروستی ڕایگەیاند، زیاتر 1600 کەس لە وڵاتەکەیان گیانیان لەدەستداوە و 3700 کەسی دیکە برینداربوون.
دەزگای بەڕێوەبردنی کارەسات و فریاگوزاری تورکیا دەڵێت زیاتر لە 24 هەزار کارمەندی فریاگوزاری لەو ناوچانە کاردەکەن کە بەهۆی بومەلەرزەکانەوە زیانیان پێگەیشتووە. دەشڵێت زیاتر لە 3 هەزار کارمەندی فریاگوزاری بیانی لە وڵاتانی جیاجیاوە گەیشتوونەتە تورکیا بۆ یارمەتیدان لە هەوڵەکانی فریاگوزاری.
جەیمس ئاڵدەر، گوتەبێژی ڕێکخراوی منداڵپارێزی سەر بە نەتەوە یەکگرتووەکان UNICEF، لە کۆنگرەیەکی ڕۆژنامەوانی لە جنێڤ وتی " ئەو بومەلەرزانەی بەرەبەیانی دوێنێ لە باشوری تورکیا و باکوری سوریایان دا ڕەنگە هەزاران منداڵیان کوشتبێت."
