ژمارەی گیان لەدەستدان لە تورکیا گەیشتە 8574
ڕەجەب تەیب ئەردۆغان، سەرۆکی تورکیا لە کۆنگرەیەکی ڕۆژنامەوانی لە شاری کەهرەمان مەرعەش ڕایگەیاند ژمارەی ئەو کەسانەی بەهۆی بومەلەرزەکەوە گیانیان لەدەستداوە گەیشتووەتە 8574 .
بەمەش کۆی ژمارەی گیان لەدەستدان بەهۆی بومەلەرزەکان لە تورکیا و سوریا بوو بە زیاتر لە 11300
بومەلەرزەیەکی نوێ بە هێزی 4.9 لە تورکیا دەداتەوە
دەزگای چاودێری بومەلەرزەی ئەمەریکا دەڵێت کاتژمێر 10:48 ی بەیانی ئەمڕۆ چوارشەممە بە کاتی خۆجێی بومەلەرزەیەک بە هێزی 4.9 پلە لە باکوری ڕۆژئاوای شاری کەهرەمان مەرعەشی داوە (37.999°N 36.473°E).
ڕوانگەی سوریا بۆ مافەکانی مرۆڤ ڕایگەیاند گیان لەدەستدان لە سوریا بەهۆی بومەلەرزەکان گەیشتە زیاتر لە 2750 کەس.
دەزگای بەڕێوەبردنی کارەسات و فریاگوزاری تورکیا دەڵێت لە پاش بومەلەرزە بەهێزەکەی بەرەبەیانی ڕۆژی دووشەممە، هەتا ئەمڕۆ چوارشەممە 648 بومەلەرزەی دیکە ڕوویانداوە.