ڕەوشی شاری عەنتاب لە پاش بوومەلەرزەکە
شاری عەنتاب یەکێکە لەو شارانەی تورکیا کە بەهۆی بوومەلەرزە وێرانکەرەکەوە زیانی زۆری بەرکەوتووە. پەیامنێرمان عارف ئەسلان لە عەنتابەوە دەڵێت لە شارەکەدا 581 باڵەخانە وێران بوون و بەشێک لە دانیشتووانی دیکە چاوەڕێی ڕزگارکردنی کەسوکاریانن لە ژێر باڵەخانە ڕووخاوەکاندا. جگە لەوەش ئەو قوربانیانەی بێ ماڵ و حاڵ ماونەتەوە پێویستیان بە هاوکاری هەیە لە کاتێکدا خەڵکەکە لە کەشێکی زۆر سەرمادا بێ ماڵ ماوون .
وەزیری دەرەوەی تورکیا مەولود چاوشئۆغڵو ڕایگەیاند کارکراوە لەسەر کردنەوەی دوو دەروازەی سنوری لە سنوری وڵاتەکە لەگەڵ سوریا بۆ هاوکارییە مرۆییەکانی پاش بوومەلەرزەکە.
ژمارەی ئەو کەسانەی لە تورکیا گیانیان لەدەستداوە دەگاتە 9057 کەس
سەرۆکی تورکیا ڕەجەب تەیب ئەردۆغان لە کۆنگرەیەکی ڕۆژنامەوانیدا ڕایگەیاند ژمارەی ئەو کەسانەی لە بوومەلەرزە بەهێزەکدا گیانیان لەدەستداوە (لە تورکیا) گەیشتووەتە 9057 کەس و گوتیشی زیاتر لە 53 هەزار کەسیش بریندار بوون.
پیشتریش ڕوانگەی سوریا بۆ مافەکانی مرۆڤ ڕایگەیاند نزیکەی 60 کاتژمێر پاش بوومەلەرزە بوومەلەرزە وێرانکارەکە ژمارەی ئەو کەسانەی لە سوریا گیانیان لەدەستداوە گەیشتووەتە 3135 کەس.
بەمەش کۆی ژمارەی ئەو کەسانەی لە بوومەلەرزەکەی تورکیا و سوریا گیانیان لەدەستداوە دەگاتە 12 هەزار و 192 کەس
بلینکن دەڵێت ئەمەریکا لە چەند ڕۆژی داهاتوودا هاوکارییەکانی زیاتر بۆ خەڵکی تورکیا و سوریا ڕادەگەیەنێت
وەزیری دەرەوەی ئەمەریکا ئەنتۆنی بلینکن ڕۆژی چوارشەممە لە کۆنگرەیەکی ڕۆژنامەوانیدا ڕایگەیاند زیانە گیانییەکانی بوومەلەرزەکەی تورکیا و سوریا " بەڕاستی مایەی سەرسوڕمانە."
بلینکن گوتی ویلایەتە یەکگرتووەکانی ئەمەریکا زیاتر لە 150 کارمەندی شارەزای بواری ڕزگارکردنی ڕەوانەی تورکیا کردووە و گوتیشی واشنتن شتی زیاتری دەبێت لە ڕۆژانی داهاتوو لەسەر چۆنیەتی بەردەوامی پشتیوانیکردنی خەڵکی تورکیا و سوریا لە کاتێکدا لەم کارەساتە دێنەوە سەرخۆ.
