ئەنتۆنیۆ گۆتێرێش، سکرتێری گشتی نەتەوە یەکگرتووەکان لە پەیامێکی ڤیدیۆییدا بۆ حەوتهەمین دیداری سلێمانی ڕایگەیاند "ئێمە دەزانین ناکۆکییەکانی ناوچەکە لە شەوێکدا سەریان هەڵنەداوە بەڵکو دەرەنجمی دەیان ساڵی چەوساندنەوە، تیرۆر، مەزهەبگەرایی و دەستێوەردانی دەرەکین."
لەگەڵ ئەوەشدا کە گوتی چاوەڕوانی ئەوە ناکرێت کێشەکان لە شەو و ڕۆژێکدا چارەسەر بکرێن بە تایبەتی وەک خۆی گوتی "لە کاتێکدا کە ناکۆکیە جیۆپۆلەتیکیەکان لە پەرەسەندندان و لە کاتێکدا کە ناجێگیری ئابووری هەیە" بەڵام بە ئاماژەدان بە سەردانەکەی ئەم داوییانەی بۆ عێراق گوتی " ئێستا دەرگایەکی نوێ هەیە بۆ بەرەوپێشچوون؛ بەرەوپێشچوون لە بوارەکانی کەرتی گشتی، فەرەچەشنکردنی ئابوری، دابینکردنی هەلی گونجاوی کار بۆ گەنجان و پێشکەوتن لە بواری جەختکردنەوە لە مافی مرۆڤ، بەرەنگاربوونەوەی گەندەڵی، سەقامگیرکردنی ناوخۆ و ناوچەکە لە ڕێگەی دیبلۆماسی و دیالۆگوە هەروەها پێشکەوتن لە بواری وەڵامدانەوەی کارەساتی سروشتی و کەمی ئاو کە مەترسی دەخەنە سەر ژیان و گوزەران."
گۆڕانی کەش و هەوا و ئاسایشی ئاو بەشێک بوو لە سەرنجی حەوتهەمین دیداری سلێمانی، کە لەلایەن زانکۆی ئەمەریکی ڕێکخراوە و ژمارەیەک لە کەسایەتییە سیاسییەکان و ئەکادیمییەکانی عێراق و جیهان تیادیا بەشدارن، لەم بارەیەوە سکرتێری گشتی نەتەوە یەکگرتووەکان گوتی " میسۆپۆتامیا خاکی کۆنی نێوان دوو ڕوبارەکانە و ناتوانێت ببێتە خاکی نوێ بەبێ ڕووبار. لە هەموو ئەو بوارانەدا، یەکێتی نیشتمانی و هاریکاری ناوچەیی گرنگن. نەتەوەیەکگرتووەکان شانازی دەکات کە بەردەوامبێت لە پشتگیری کردنی عێراق لە بەرەنگاربوونەوەی ئاڵنگاریەکانی ئەمڕۆ و دواڕۆژ، با پێکەوە کاربکەین بۆ دۆزینەوەی چارەسەری بەردەوام بۆ هەموو کێشەکانی عێراق و ڕۆژهەڵاتی ناوەڕاست."
لە سەرەتای ئەم مانگەش گۆتێرێش لە میانەی سەردانەکەیدا بۆ بەغدا و وتووێژی لەگەڵ سەرۆک وەزیرانی عێراق باسی لە ئاسیش ئاو و ئاڵەنگارییەکان لەو بارەیەوە کرد و عێراقی بانگهێشت کرد بۆ بەشداری کردن لە کۆنفرانسی ئاوی ساڵی 2023 کە لە نیویۆرک ئەنجام دەدرێت.
شایانی باسە هەردوو ڕووباری دیجلە و فورات سەرچاوەکانیان لە ناو تورکیاوەیە و بە سوریا و عێراقدا تێدەپەڕن و تەنها سەرچاوەی ئاوی عێراقن، بەڵام ئێستا بەهۆی دروستکردنی بەنداو لە ناو تورکیا ڕێژەی ئاوی ڕووبارەکان بە شێوەیەکی بەرچاوە کەمیان کردووە و ئەمەش مەترسی ناسەقامگیری ئاو لە عێراقدا دروست دەکات.
