شاهۆ حسێن قادر دوای بڕینی زیاتر لە 392 کیلۆمەتر ڕێگە بە عەرەبانەی خاوەن پێداویست و لە کەشوهەوایەکی گەرم و مەترسیدار لە بەرواری 27 ی حەوتی 2023 گەشتە بەغدا و ماوەی 11 ڕۆژە لە بەغدا چاوەڕوانی بینی سەرۆک وەزیرانی عێراقە و دەڵێت ئەگەر سەرۆک وەزیران بەدەمیەوە نەیەت ئەوا لە بەردەم بینای سەرۆک وەزیرانی عێراق ماندەگرێت .
شاهۆ حسێن لە لێدوانێکدا بە دەنگی ئەمەریکای ڕاگەیاند، "دوای چاوەڕوانییەکی زۆر و بینینی بە شێک لە فراکسیۆنە کوردیەکان و گەیاندنی پەیامەکانی من بۆ بینی سەرۆک وەزیرانی عێراق، هەوڵەکان بێ ئەنجام بوون و تا ئێستا دیار نییە من کەی دەتوانم ئەوان ببینم و پەیامی بریندارانی چەکی کیماوی پێ بگەیەنم."
وتیشی " ئەگەر سەرۆک وەزیران ئامادە نەبێت من ببینێت ئەوان من ڕێگاچارەی دیکە دەگرمە بەر کە سەرەکیترینیان لە بەردەم بینای سەرۆک وەزیرانی عێراق خەیمەیەک هەڵدەدەم و ناگەڕێمەوە هەڵەبجە، تا ئەو کاتەی سەرۆک وەزیران گوێ بۆ داواکارییەکانی بریندارانی چەکی کیمیاوی دەگرێت کە من بە نووسین پێمە و تەنها ڕادەستی خۆی دەکەم ."
ئاریان تاوەگۆزی ئەندامی پەرلەمانی عێراق لە فراکسیۆنی نەوەی نوێ لە لێدوانێکدا بە دەنگی ئەمەریکای ڕاگەیاند، " ئێمە وەک فراکسیۆن لە کەرکوک و لە بەغداش پێشوازیمان لێ کردووە. هەوڵەکانمان بە ئاڕاستەی ئەوەبوون کە هەفتەی داهاتوو سەرۆکی پەرلەمانی عێراق و وەزیری تەندروستی ببینێت و لەگەڵ نووسینگەی سەرۆک وەزیرانیش قسەمانکردووە و پێمان ڕاگەیاندوون کە بریندارێکی چەکی کیمیاوی دەیەوێت سەرۆک وەزیران ببینیت."
ئاریان تاوەگۆزی وتیشی، "من لەگەڵ ئەوەی شوقەکەی خۆمم پێداوە بۆ حەسانەوە و مانەوە ، بەڵام پێم وتووە کە ئازادە چۆن لەگەڵ چ فراکسیۆنێکی دیکەش هەوڵی بینینی سەرۆک وەزیران دەدات ، بەڵام ئەوەی تا ئێستا بە شاهۆ گەشتووە لەگەڵ فراکسۆنەکانی دیکە هیچ ئەنجامێکی نەبووە."
چرۆ شەریف، ئەندامی پەرلەمانی عێراق لە فراکسیۆنی سەوز لە لێداونێکدا بە دەنگی ئەمەریکای ڕاگەیاند، " ئێمە لە فراکسیۆنی سەوز لەگەڵیدا دانیشتووین و خالید شوانی وەزیری دادمان ئاگادارکردووەتەوە کە کاتێکی بۆ تەرخان بکات تا سەرۆک وەزیران بیتوانێت ئەو بریندارەی چەکی کیماوی ببینێت. وەک لیژنەی شەهیدانیش لەسەر داواکاریەکانی گفتوگۆمان کردووە و پشتیوانی هەموو داواکارییەکانی دەکەین."
ئەو ئەندامەی پەرلەمانی عێراق سەبارەت بە نائومێد بوونی بریندارەکەی چەکی کیمیاوی بۆ بینی سەرۆک وەزیران ڕایگەیاند، "بینی سەرۆک وەزیران کاتی دەوێت و بۆ ئەندامانی پەرلەمانیش ئەو سەردانانە ئاسان نین لە ڕێگەی داواکارییەوە کە پێشکەش بە نووسینگەی سەرۆک وەزیران دەکرێت و چەند ڕۆژێکی پێ دەچێت. لەگەڵ ئەوەشدا ئێمە لە هەفتەی ئایندە هەوڵەکانمان چڕ دەکەینەوە بۆ ئەوەس هەر چۆنێک بێت سەرۆک وەزیران ببینێت."
شاهۆ حسێن قادر، بریندارەکەی چەکی کیمیاوی هەڵەبجە ئەمڕۆ گەیشتە شاری بەغدا دوای ئەوەی نۆ ڕۆژ لەمەوبەر لە شاری هەڵەبجەوە بە گەرمای بە تینی هاوین و بە بەکارهێنانی کورسی خاوەن پێداویستی تایبەت بەرەوە پایتەختی عێراق بەڕێکەوت.
ئەو بە دەنگی ئەمەریکای ڕاگەیاند ئێستا لە شوێنی مانەوەی ئەندام پەڕلەمانێکی کوردە لە بەغدا و چاوەڕێ دەکات ڕۆژی دووشەمە لەگەڵ گەڕانەوەی ئەندام پەرلەمانەکانی عێراق بۆ سەر کارەکانیان بچێتە لای سەرۆک وەزیرانی عێراق محمد شیاع سودانی بۆ ئەوەی پەیامی بریندارانی هەڵەبجەی پێبگەیەنیت.
شاهۆحسێن بە دەنگی ئەمەریکای ڕاگەیاند کە لە گەشتە مەحاڵەکەیدا تووشی ئاستەنگی زۆر بووە، بەڵام کۆڵی نەداوە. سەرەڕای گەرمای بەتینی هاوین، لەسەر ڕێگاش ڕووبەڕووی چەندین ڕێگری بۆتەوە. ئەو ڕایگەیاند "چەند کەسێک هەڕەشەیان لێکردم بەڵام من گوێم بەو هەڕەشانە نەداوە و لە هەندێک ناوچەش وەک شێت و کەسێکی ناتەواو سەیریان کردووم بەهۆی جل و بەرگەکەم و لە بەغداش هێزێکی ئەمنی ڕێگەیان پێگرتم لە کاتی ڕاهێناندا. من گوێم بەو بابەتانە نەداوە."
شاهۆ حسێن وتی، "ئێستا گەشتوومەتە بەغدا و لە ماڵی ئاریان تاوەگۆزی ئەندامی پەرلەمانی عێراقم و کە پێشوازی لێکردووم؛ هەریەک لە کاک شوان محمد و چرۆ شەریف سوپاسیان دەکەم لە فراکسیۆنی پارتی و یەکێتی پەیوەندیان پێوەکردووم. چاوەڕێ دەکەم ڕۆژی دووشەمە کە بڕیارە دانیشتنی پەرلەمانی عێراق هەبێت و ئەندامانی پەرلەمانی عێراق لە هەموو فراکسیونە کوردیەکان بگەڕێنەوە بەغدا و بەرنامەی بینی سەرۆک وەزیرانی عێراق دابنێین و چاوم لە هاوکاری هەموو فراکسیۆنە کوردیەکانە بۆ بریندارانی چەکی کیمیاوی هەڵەبجە "
بریندارەکەی هەڵەبجە وتیشی، "هەموو داواکاریەکانی بریندارانی چەکی کیمیاویم پێیەو و ئەو داواکاریانە دەگەیەنم بە سەرۆک وەزیرانی عێراق و بەجێ بەجێ کردنی ئەو داواکاریانە ئەو ناڕەحەتی و گەرما و مەترسیانەی ڕێگا کە هاتووەتە بەردەمم بیرم دەچێتەوە".
شاهۆ لە کۆتاییدا وتی، "سوپاسی هەموو خەڵکی کوردستان بەگشتی و هەڵەبجە بەتایبەتی دەکەم کە لەم گەشتەدا هاوکاربوون... ئێستاش پێیان دەڵێم تەندروستیم زۆرباشە بەڵام ماندووش بووم، گرنگ ئەنجامە کەیە و دەخوازم سەرۆک وەزیرانی عێراق بە کرداری بەدەم داواکاریەکانی بریندارانەوە بێت."
شاهۆ حسێن ئەمڕۆ دووشەممە بە دەنگی ئەمەریکای ڕاگەیاند، " لە کەش و هەوایەکی گەرمدا دوای ڕۆژێک مانەوەم لە کەرکوک، درێژەم بە گەشتەکەم دا تا گەشتمە داقوق و دوز خورماتوو. دواتر دوای پشوودان لەوێ دەستم بە گەشتەکەم کردووە و ئێوارەی ئەمڕۆ گەشتوومەتە عوزێم و چەند سەرۆک عەشیرەتێک ئاگاداریان کردوومەتەوە کە پێشوازیم لێ دەکەن."
وتیشی، " ڕێگاکە مەترسیدارە و دوای پشوویەکی دیکە بەرەو بەغدا بەڕێدەکەوم. ئەندام پەرلەمانە کوردەکان لە کوردستانن بڕیارە بگەڕێنەوە لە بەغدا و پێشوازیم لێ بکەن."
سەبارەت بە کاردانەوەکانی خەڵکی ئاماژەی بەوەکرد ، "خەڵکێکی زۆر بەدەمەوەیە. ئەوەندە سەرم قاڵ بووم دوو ڕۆژە نەم توانیووە پەیوەندی بە منداڵەکانمەوە بکەم و ئەمڕۆ قسەم لەگەڵ کردوون و پێم ڕاگەیاندن بەم نزیکانە لە بەغدا بە داواکاری بیریندارانی چەکی کیمیاوی هەموو هەڵەبجەوە دەمبینن."
شاهۆ حسێن قادر دوای ئەوەی ڕۆژی سێشەممە بە عەرەبانەکەی لە هەڵەبجەوە گەشتە پارێزگای سلێمانی و ڕۆژێک بۆ پشوودان و چاکردنی عەرەبانەکەی مایەوە، ئەمڕۆ پێنجشەمە لە کاتژمێر 5:30 خولەکی سەرلەبەیانی دەستیکردەوە بە گەشتەکەی و گەیشتە قەزای چەمچەماڵ و پاشان بۆ کەرکوک و لەوێ لەلایەنە ژمارەیەک چالاکوانەوە پێشوازی لێکرا.
شاهۆ حسێن لە لێدوانێکدا بۆ دەنگی ئەمەریکای ڕایگەیاند، "گەشتی ئەمڕۆشم لە کەشوهەوایەکی گەرم و مەترسییەکی زۆری ڕێگە و بان دەستپێکرد و ئەو زەحمەتیانەی کە هەبوون لە بەرز و نزمی ڕێگە و بان تێم پەڕاندوون و ئێوارەی ئەمڕۆ گەیشتمە بازگەی کەرکوک و ئەم شەو لەوێ دەمێنمەوە."
شاهۆ وتیشی، "سوورم لەسەر گەشتن بۆ بەغدا و هاووڵاتیانش شاهیدم بۆ دەدەن کە من بە عەرەبانەکەم بەردەوامم تا دەگەمە بەغدا. ئێستا بە خۆشحاڵیەوە لە کەرکوکەوە بۆ بەغدا ڕێگاکە ئاسانتر دەبێت بۆم بەو پێیەی بەرزو نزمی تێدا نییە و خەڵکێکی زۆریش لە کەرکوک و چەمچەماڵ پێشوازیان لێکردووم."
