وەزارەتی دەرەوەی ئێران ڕۆژی یەکشەممە وتی چارەنووسی سوریا تەنها بەرپرسیارێتی گەلی سوریایە و دەبێت بەبێ دەستوەردانی دەرەکی کاری لەسەر بکرێت، ئەوەش دوای ئەوەی بەشار ئەسەدی هاوپەیمانی ئێران دوورخرایەوە.
ئێران ملیاران دۆلاری خەرج کرد بۆ ئامادەکردنی ئەسەد لە ماوەی شەڕی ناوخۆی سوریادا کە لە ساڵی 2011 دا هەڵگیرسا، هەروەها سوپای پاسدارانی ڕەوانەی سوریا کرد بۆ هێشتنەوەی ئەسەد لەسەر دەسەڵات و پاراستنی " بەرەی مقاوەمە " ی گروپە چەکدارییەکانی لایەنگری تاران لە دژی ئیسڕائیل و کاریگەرییەکانی ئەمەریکا لە ڕۆژهەڵاتی ناوەڕاستدا.
دوابەدوای ڕووخانی حکومەتەکەی ئەسەد، وەزارەتی دەرەوەی ئێران داوای گفتوگۆیەکی نیشتیمانی کرد بۆ پێکهێنانی حکومەتێکی گشتگیر کە نوێنەرایەتی سەرجەم بەشەکانی کۆمەڵگەی سوریایی بکات.
وەزارەتەکە وتی " سەرجەم هەوڵی خۆمان دەدەین بۆ یارمەتیدان لە خستنەوەی ئاشتی و سەقامگیری لە سوریادا، لەو بارەیەشەوە بەردەوام دەبین لە ڕاوێژییەکانمان لەگەڵ سەرجەم لایەنە کاریگەرەکاندا، بە تایبەتی لە ناوچەکەدا."
پەیوەندییەکانی تاران لەگەڵ دیمەشقدا یارمەتیدا کاریگەرییەکانی لە ڕێی ڕێڕەوێکی وشکانییەوە لە سنووری ڕۆژئاوایەوە لەگەڵ عێراقدا بڵاوبکاتەوە تاوەکو لوبنان، ئەو ڕێڕەوەشی بەکارهێناوە بۆ گەیاندنی پشتیوانییەکان بۆ حزبوڵا.
وتەبێژی وەزارەتی دەرەوەی ئێران ئیسماعیل باقایی وتی کارمەندانی باڵیۆزخانەکەی ئێران لە دیمەشق پێش هێرشەکان بیناکەیان چۆڵ کردووە و سەرجەم دیبلۆماتکارەکان تەندروستییان باشە.
باقایی وتی " کۆماری ئیسلامی لەگەڵ سەرجەم لایەنە بەرپرسەکاندا لە پەیوەندیدایە لەسەر پێشهاتەکانی ئەمدواییانەی ناو سوریا، هۆشداریشیداوە لەسەر ئەم کێشەیە ' هەڵکوتانە سەر باڵیۆزخانەکە ' و داوای ڕێگریکردنی کردووە لە دووبارە ڕوودانەوەی ئەو هێرشانە."
سەرچاوە/ ڕۆیتەرز
