وەزیری پێشووی دەرەوەی ئێران کە کەسێکی گرنگ بوو بۆ ڕێککەوتنە ئەتۆمییەکەی ساڵی 2015 ی نێوان ئێران و زلهێزەکانی جیهان، ڕۆژی دووشەممە دەست لە کارکێشانەوەی خۆی لە حکومەتە چاکسازیخوازەکەی سەرۆکی ئێران مەسعود پزیشکیان پێشکەش کرد، ملکەچی فشاری توندڕەوەکان بوو.
دەست لە کارکێشانەوەی محەمەد جەواد زەریف ئاماژەیەکە لەسەر پاشەکشەی خێرای ئێران لە گەیاندنی پەیامەکان بە ڕۆژئاوا لە کاتێکدا کە سەرۆکی ئەمەریکا دانۆڵد ترامپ سزاکانی سەر تاران توندتر دەکاتەوە.
زەریف لە ماوەی ڕابردوودا جێگری پزیشکیان بووە و لە مێژە بووەتە ئامانجی توندڕەوەکانی نێو وڵاتەکە. پێشتریش هەوڵیدا دەست لە کاربکێشێتەوە و هێشتا ڕوون نیە کە ئایا ئەم جارە پزیشکیان ڕازی بووە بە دەست لە کارکێشانەوەی زەریف لە حکومەتدا یان نا.
ئەم پەرەسەندنە دوای ئەوە هات ڕۆژی یەکشەممە پەرلەمانی ئێران وەزیری ئابووری وڵاتەکە عەبدولناسر هیمەتی لە پۆستەکەی دوورخستەوە، هیمەتی پێشتر خۆی کاندید کردبوو بۆ هەڵبژاردنەکانی سەرۆکایەتی ئێران و ئاماژەی بەوەدابوو کە ئامادەیە ڕاستەوخۆ قسە لەگەڵ سەرۆکایەتی ئەمەریکادا بکات.
محەمەد ئیبراهیم ئەنساڕی لاری چاکسازیخواز و شرۆڤەکاری سیاسیی دەڵێت " ناخۆشترین ڕۆژەکان لەبەردەم پزیشکیاندایە."
دەزگای هەواڵی ئیرنای ئێران بڵاویکردەوە ڕۆژی دووشەممە زەریف نامەی دەست لە کارکێشانەوەکەی پێشکەشی پزیشکیان کردووە، بەڵام دیار نیە کە ئایا پزیشکیان پەسەندی کردووە یان نا. ئەمە دووەمین جارە زەریف هەوڵی دەست لە کارکێشانەوە دەدات وەکو جێگری پزیشکیان بۆ کاروباری ستراتیژی.
زەریف لە ئێکس نوسیویەتی ڕۆژی یەکشەممە لەگەڵ بەرپرسی دەسەڵاتی دادوەری وڵاتەکە غوڵامحوسەین موحسینیدا کۆبووەتەوە.
وتی " بەپێی دۆخی وڵاتەکە، ئەو پێشنیاری کرد من بگەڕێمەوە بۆ زانکۆ بۆ ڕێگریکردن لە فشاری زیاتر بۆ سەر حکومەت. منیش دەستبەجێ ڕازی بووم."
سەرچاوە/ AP
