ڕۆژی دووشەممە سوپای ئۆکرانیا ڕایگەیاند 24 فڕۆکەی بێفڕۆکەوانی خستووەتە خوارەوە کە ڕووسیا شەوی ڕابردوو بەکاریهێناون بۆ هێرشکردنە سەر چەندین ناوچە لە وڵاتەکەدا.
هێزی ئاسمانی ئۆکرانیا وتی بەرپەرچدانەوەکان بەسەر هەرێمەکانی دنیپرۆپیترۆڤسک و خارکیڤ و کیرۆڤۆهراد و کیێڤ و پۆڵتاڤا و سومی و ڤینیتسیاوە بوون.
فەرمانڕەوای هەریمی دنیپرۆپیترۆڤسک سێرهێی لیاسک وتی هێرشەکانی ڕووسیا بوونەتە هۆی برینداربوونی دوو کەس و زیانگەیاندن بە خانوو و بینا کشتوکاڵییەکان.
بەرپرسانی خارکیڤیش وتیان زیان بە ژێرخانی هەرێمەکە گەیشتووە.
لە هەرێمی بێلگۆرۆدی ڕووسیا کە دەکەوێتە سەر سنووری ئۆکرانیا، بەرپرسانی هەرێمەکە ڕۆژی دووشەممە وتیان بەهۆی هێرشێکی ئۆکرانیاوە کەسێک بریندار بووە و چوار بینای نیشتەجێبوونیش لە شاری شیبیکینۆ زیانییان پێگەیشتووە.
فەرمانڕەوای هەرێمی بێلگۆرۆد ڤیاچیسلاڤ گلادکۆڤیش وتی فڕۆکە بێفڕۆکەوانەکانی ئۆکرانیا هێرشییان کردووەتە سەر گوندی ئیلیک پێنکۆڤکا، دوو خانوو گڕییان تێبەربووە و بینایەکی دیکەش زیانی پێگەیشتووە.
سەرچاوە/ دەنگی ئەمەریکا
ئۆکرانیا دەڵێت 24 فڕۆکەی بێفڕۆکەوانی ڕووسیای خستووەتە خوارەوە
