ڕێکخراوەی لێبوردنی نێونەتەوەیی لە نامەیەکدا بۆ سەرۆکی دەسەڵاتی دادوەری کۆماری ئیسلامی ئێران داوای هەڵوەشاندنەوەی دەستبەجێی سزای لەسێدارەدانی ڕەزا ڕەسایی، گەنجێکی کوردی خەڵکی کرماشان دەکات.
نەسیم پاپایانی لە ڕێکخراوی لێبوردنی نێونەتەوەیی لەمبارەیەوە بە بەشی کوردی دەنگی ئەمەریکای ڕادەگەیەنێت، "دوێنێ (شەشی مانگی یازدە) ڕێکخراوی لێبوردنی نێودەوڵەتی لە هەنگاوێکی دەستبەجێدا داوای لە چالاکوانان و لایەنگرانی خۆی لە سەرانسەری جیهان کرد کە بەپەلە هەنگاو بنێن بۆ پشتیوانی لە ڕەزا ڕەسایی، کوردێکی یارسان کە لە پێوەند بە ناڕەزایەتییە سەرتاسەرییەکانی "ژن،ژیان، ئازادی"وە مەترسی لەسێدارەدانی لەسەرە."
Reza Rasaei is at risk of protest-related execution in Iran after being convicted of "murder" & sentenced to death in Oct %2723. During a grossly unfair trial, the court summarily dismissed his torture allegations used to extract his forced "confessions". https://t.co/t2632Oq7Vd pic.twitter.com/JLLwqchMou
— Amnesty Iran (@AmnestyIran) November 7, 2023
ڕەزا ڕەسایی هاووڵاتییەکی کوردی پەیرەوەی ئایینی یارسانە کە لە ناڕەزایەتییەکانی ساڵی ڕابردوو دەستبەسەر کرا و دواتر لە لایەن دەزگای دادوەری کۆماری ئیسلامی ئێرانەوە بە تۆمەتی "بەشداری لە کوشتنی بە ئەنقەست"ی نادر بەیرامی، بەرپرسی ڕێکخراوی ئیتلاعاتی سوپای پاسدارانی شاری سەحنە، سزای لەسێدارەدانی بەسەردا سەپێندرا.
ئەمەش ببینە
گەنجێکی کوردی پەیڕەوی ئایینی یارسان سزای لە سێدارەدانی بەسەردا دەسەپێنرێتڕەزا ڕەسایی چەندین جار ڕەتیکردوەتەوە دەستی لە کوشتنی ئەو بریکارەی کۆماری ئیسلامی ئێراندا هەبووبێت.
لقی دووی دادگای تاوانەکانی پارێزگای کرماشان جگە لە سەپاندنی سزای لەسێدارەدان بەسەر ناوبراودا، بە تۆمەتی "تێکدانی ئاسایشی گشتی" سزای ساڵێک زیندانیکردن و لێدانی 74 قامچیشی بەسەردا سەپاندووە.
خانم پاپایانی، ئەندامی ڕێکخراوی لێبوردنی نێونەتەوەیی دەڵێت "بە وتەی سەرچاوەیەکی ئاگادار لە دۆخی ڕەزا ڕەسایی، ناوبراو دوای دەستبەسەرکردنی لە 24ی یازدەی ساڵی ڕابردوو لە لایەن هێزە ئەمنییەکانەوە، لە کاتی لێپرسینەوە لە دەستبەسەرگەی شاری سەحنەی پارێزگای کرماشان، ڕووبەڕووی ئەشکەنجە و هەڵسوکەوتی خراپی دیکە بووەتەوە، لەوانەش لێدانی تەزووی کارەبا لە جەستەی ناوبراو و هەروەها بردنی تا ئاستی خنکاندن بە کێشانی کیسەی نایلۆن بەسەریدا و هەروەها لێدانی توندی بە مەبەستی وەرگرتنی "دانپێدانان"ی زۆرەملێ."
ڕێکخراوی لێبوردنی نێونەتەوەیی لە نامەکەیدا کە لە ڕێگای باڵیۆزخانەی ئێران لە یەکێتی ئەوروپا بۆ غوڵامحسێن موحسین ئێژەیی، سەرۆکی دەزگای دادوەری کۆماری ئیسلامی ئێرانی ناردووە، باس لەوە دەکات مافی دادگاییکردنی دادپەروەرانەی ڕەزا ڕەسایی، لەوانەش دەستڕاگەیشتنی ناوبراو بە پارێزەرێکی هەڵبژێردراوی خۆی بە ڕوونی پێشێل کراوە و هەروەها دادگاییکردنەکەی لەلایەن دادگایەکی سەربەخۆ و کارامە و بێلایەنەوە بەڕێوەنەچووە.
ڕێکخراوە دەشڵێت "چەندین جار پرسی وەرگرتنی دانپێدانانی زۆرەملێ لە لایەن دەسەڵاتدارانی کۆماری ئیسلامی ئێران و بەکارهێنانی ئەو جۆرە دانپێدانانە لە لایەن دادگاکانی ئەو وڵاتەوە بۆ دەرکردنی سزای لەسێدارەدان بۆ ژمارەیەک لە دەستبەسەرکراوانی ناڕەزایەتییەکانی "ژن، ژیان، ئازادی" لە لای خۆی تۆمار کردووە."
ڕێکخراوەکە داوای لە سەرۆکی دەزگای دادوەری کۆماری ئیسلامی ئێران کردوە دەستبەجێ سزای لەسێدارەدانی ڕەزا ڕەسایی هەڵبوەشێنێتەوە و دەڵیت ئەگەر ناوبراو تاوانبار کرا بە تاوانێکی دیاریکراو، ئەوا پێویستە بەپێی پێوەرە نێودەوڵەتییەکان بخرێتە بەردەم دادگا بەبێ ئەوەی سزای لەسێدارەدانی بەسەردا بسەپێندرێت یان دانپێدانانی زۆرەملێی لێوەربگیرێت.
ئەو ڕێکخراوەی مافەکانی مرۆڤ هەروەها داوای کردووە کە ڕەزا ڕەسایی ڕێگەی دەستڕاگەیشتنی بە پارێزەر و چاودێری پزیشکی گونجاو پێبدرێت.
خاتوون نەسیم لە ڕێکخراوی لێبوردنی نێودەوڵەتی دەڵێت "ڕەزا ڕەسایی تەنها یەکجار لە ڕۆژی دادگاییکردنەکەیدا چاوی بە پارێزەرەکەی کەوتووە."
زیادبوونی لەسێدارەدانەکان لە لایەن کۆماری ئیسلامی ئێرانەوە دوای ناڕەزایەتییە سەرتاسەرییەکانی "ژن، ژیان، ئازادی" بووەتە جێگای نیگەرانی و ڕەخنەی توندی دامەزراوەکانی مافەکانی مرۆڤ و چالاکوانان لە جیهاندا.
پێشتر سکرتێری گشتی نەتەوە یەکگرتووەکان لە ڕاپۆرتێکی نوێدا ڕایگەیاند کە کۆماری ئیسلامی "بە ڕێژەیەکی ترسناک" خەریکی لەسێدارەدانە و ژمارەی لەسێدراەدراوان لە حەوت مانگی یەکەمی ئەمساڵ بە بەراورد بە هەمان ماوەی ساڵی ڕابردوو بە ڕێژەی 30% زیادی کردووە.
ڕێکخراوی مافی مرۆڤی ئێرانیش هەروەها چەند ڕۆژ پێش ئێستا ڕایگەیاندووە کە ئەمساڵ زیاتر لە 600 کەس لە لایەن کۆماری ئیسلامی ئێرانەوە لە سێدارە دراون کە بەرزترین ئامارە لە ماوەی هەشت ساڵی ڕابردوودا.