کوڵبەرێکی خەڵکی شاری سەقز، ئێوارەی ڕۆژی شەممە بە گولەی هێزەکانی ئێران گیانی لەدەستدا.
ڕێکخراوی هەنگاو بۆ مافەکانی مرۆڤ دەڵێت مەنسوور محەممەد نژادی تەمەن 45 ساڵ و خەڵکی گوندی جونیانی سەر بە ناوچەی زێویەی شاری سەقز، بەهۆی تەقەی ڕاستەوخۆی هێزە سنوورییەکانی ئێران لە سنووری بەستام کوژراوە.
ڕێکخراوەکە لە زاری سەرچاوەیەکی ئاگادارەوە ڕایشیگەیاندووە " ئەم کۆڵبەرە لە پشتەوە بە فیشەکی کڵاشینکۆڤ پێکراوە."
ئەمەش ببینە کوژرانی کۆڵبەرێکی کورد بە تەقەی ڕاستەوخۆی هێزەکانی پاسەوانی سنووری عێراق و کاردانەوە ناوخۆییەکان
هێرشی هێزەکانی ئێران بۆ سەر کۆڵبەرە کوردەکان بووەتە هەواڵی ڕۆژانەی بەشێک لە میدیاکان، بەڵام تا ئێستا هیچ کام لە ڕێکخراوەکانی مافەکانی مرۆڤی نێودەوڵەتی و دەسەڵاتدارانی ئەو ناوچانە هەنگاوێکی ئەوتۆیان نەناوە بۆ کەمکردنەوە و نەهێشتنی ئەم ڕووداوانەی بەرۆکی خەڵکی کوردی کەمدەرامەتی ناوچە کوردییەکانی ئێرانی گرتووە، کە بە ڕادەیەک گیانی خۆیان دەخەنە مەترسی بۆ پەیداکردنی بژێوی ژیانی خێزان و منداڵەکانیان.
بە گوێرەی ڕاپۆرتێکی هەفتەی ڕابردووی پەیامنێری دەنگی ئەمەریکا لە هەڵەبجە، بەم دواییانە بەشێک لەدەسەڵاتدارانی ناوچە سنورییەکانی هەرێمی کوردستان و عێراق دوای کوژرانی کۆڵبەرێکی کورد بە تەقەی هێزە سنورییەکانی هەرێمی کوردستان نیگەرانی خۆیان ڕاگەیاند و چەند لیژنەیەکیشیان بۆ ئەم مەبەستە پێکهێناوە، بەڵام هێشتا هەنگاوێکی تۆکمە بۆ نەهێشتنی ئەم ڕووداوانە بەدی ناکرێت.