4 ساڵ بەسەر 16 ی ئۆکتۆبەری ساڵی 2017 دا تێدەپەڕێت، کورد، کەرکوک و زۆربەی ناوچە کێشەلەسەرەکانی لەماوەیەکی کەمدا لەدەستدا و هێزە عێراقیەکان ئەو ناوچانەیان کۆنترۆڵکرد، بەڵام هێشتا یەکێتی و پارتی قۆناغی یەکتری تۆمەتبارکردنیان تێنەپەڕاندووە. پارتی، یەکێتی بە"خیانەت" و یەکێتیش، پارتی بە ئەنجامدانی ڕیفراندۆم و هۆکاری لەدەستدانی ئەو ناوچانە تۆمەتبار دەکات.
شەوی 16 ی ئۆکتۆبەری ساڵی 2017 ، کورد لە قەزای خورماتووی پارێزگای سەڵاحەدین، زۆرترین قوربانی هەبوو، بەشێوەیەک سەدان ماڵ تەقێنرانەوە، ژمارەیەک پێشمەرگە گیانیان لەدەستدا و ژمارەیەکیش دەستگیرکران، هێزێکی زۆریش بەشەڕ لە قەزاکە گەمارۆیان شکاند و قوتاریان بوو.
لەم گفتووگۆیەدا لەگەڵ دەنگی ئەمەریکا، کەریم شکور بەرپرسی مەڵبەندی حەمرینی یەکێتی، کە شەوی 16 ی ئۆکتۆبەری ساڵی 2017 لەگەڵ هێزێکدا لەناو قەزای خورماتوودا بوو، گەمارۆدرابوو، بەڵام دواتر گەمارۆکەیان شکاندووە و دەربازیان بووە، دەڵێت"پێش 16 ی ئۆکتۆبەر داوامانکرد ڕیفراندۆم لەکەرکوک و ناوچە کێشەلەسەرەکان نەکرێت، چونکە بەردەوام ئاڵۆزیان تێدابوو، کە ڕیفراندۆم کرا، وەزعەکان خراپتربوون."
وتیشی"ڕیفراندۆمیش نەکرایە، هەر توشی کێشە دەبووین، بەڵام لەوانەیە بەجۆرێکی تر، نەک بەو شێوەی کەبەسەرمان هات."
ئەمەش ببینە فەرماندەیەکی بڵای پێشمەرگە: عێراق لە 16 ی ئۆکتۆبەر پلانی گرتنی هەولێریشی هەبوو
شەوی 16 ی ئۆکتۆبەر، هێزەکانی پێشمەرگە لەکەرکوک و خورماتو و ناوچەکانی تر کشانەوە، لەکاتێکدا هێشتا بەشێک لە هێزە کوردیەکان مابوونەوە و ئاگاداری دۆخەکە نەبوون، لەو بارەیەوە کەریم شکور دەڵێت"کاتێک لەناو خورماتوودا بووم، لەگەڵ برادەرانی کەرکوک قسەم کرد، وتیان کەرکوکمان لەدەستداوە، بۆیە عیلاجی خۆتان بکەن لەخورماتوو، بەڵام ئێمە تا کاتژمێر 7 ی بەیانی لەخورماتوو گەمارۆ درابووین، دواتر بە زەحمەت دەرچووین."
جەختیشیکردەوە"کاتێک بڕیاری کشانەوەیان لەخورماتوو داوە، دەبووایە بە جادەی عامدا و دوو کیلۆمەتر بەنێو هێزی بەرامبەردا بکشێنەوە، بۆیە پێشبینیان کردووە 50% هێزەکانیان لەناو بچن، بەڵام سەرباری شەهیدبوون و دەستگیرکردنی ژمارەیەکیان، قوربانیەکان لەوە کەمتربوون، کە پێشبینیان کردبوو."
هێرشی هێزە عێراقیەکان لە 16 ی ئۆکتۆبەر بۆ سەر هێزە کوردیەکانی خورماتوو جیاوازبوو، چەکی جیاواز و قورستریان بەکاردەهێنا، هۆکاری ئەمەش بۆ هاوکاری کردنیان لەلایەن هێزە هەرێمیەکانەوە گێڕدرایەوە، بەڵام کەریم شکور وتی"ناتوانم بڵێم خەڵکی تریان لەگەڵ بوو، بەڵام بەراورد بەشەڕەکانی تر، ئەو هاوەن و چەکانەی شەوی 16 ی ئۆکتۆبەر بەرامبەرمان بەکارهێنرا، جیاوازبوو، هەم چەکەکان قورستربوون، هەم ئامانجەکانیشیان بەوردی دەپێکا."
لەکۆتایی گفتووگۆکەیدا لەگەڵ دەنگی ئەمەریکا، کەریم شکور بەرپرسی مەڵبەندی حەمرین ی یەکێتی، زیاتر لە سەر شەڕەکانی شەوی 16 ی ئۆکتۆبەر دواو وتی"جگە لەو چەکە قورسانەی بەکاریان دەهێنا، ئامانجەکانیان دەقیق بوو، چەکەکانیشیان کاریگەربوو، تەنها ئەو شەوە، 25 هاوەنیان خستە نێو مەڵبەندەوە."
Your browser doesn’t support HTML5
کەریم شوکور