حکومەتی تاڵیبانی ئەفغانی چاندنی ئەو ڕووەکانەی لە سەرانسەری وڵاتدا قەدەغە کرد، کە مادەی هۆشبەریان لێ بەرهەم دەهێنرێت، لەوانە ڕووەکی خەشخاش و ئەفیون.
ئەفغانستان گەورەترین بەرهەمهێنەری ئەفیۆنە لە جیهاندا و لەسەدا 85 ی بەرهەمی جیهانی ئەو مادەیە بەرهەم دەهێنێت.
بۆ ئەو مەبەستە هیبەتوڵڵا ئاخونزادە رابەری باڵای گروپی تاڵیبانی ئیسلامی حوکمڕانی وڵات فەتوایەکی دەرکرد و تێدا بەرهەمهێنان، بەکارهێنان، گواستنەوە و بازرگانیکردن و هەناردەکردنی هەموو مادە هۆشبەرەکانی دیکەی قەدەغەکرد.
هاوکات وەزارەتی نێوخۆی تاڵیبان لە کۆنگرەیەکی ڕۆژنامەوانیدا لە کابول ڕایگەیاند هەرکەسێک لە ئەفغانستان ئەم فەتوایە پێشێل بکات ئەوا دەستبەجێ کێڵگە ڕووەکیەکانی لەناودەبرێت و کەسی پێشێلکاریش بە گوێرەی شەریعەت سەروسەودای لەگەڵدا دەکرێت.
جێی ئاماژەیە لەو کاتەوەی گروپی توندڕەوی تاڵیبان دەسەڵاتیان لە ئەفغانستان لە مانگی 8 ی ساڵی ڕابردوەوە گرتەوە دەست، تاڵیبان کەوتووەتە ژێر فشاری وڵاتانی هاوسێ و هەرێمییەوە بۆ ئەوەی بەگژ بەرهەمهێنانی مادە هۆشبەرەکان لە وڵاتدا بچێتەوە، هەروەها ڕێگری لە بازرگانیکردن بەو مادە هۆشبەرانەوە بکات.
سەرچاوە: دەنگی ئەمەریکا
