ژمارەی ئەو کەسانەی بەهۆی بوومەلەرزە بەهێزەکەی تورکیا و سوریاوە گیانیان لەدەستداوە گەیشتە زیاتر لە 5100 کەس. بە پێی دواین زانیاری ژمارەی کوژراوەکان لە تورکیا 3500 کەسی تێپەڕاند و لە سوریاش بەلایەنی کەم 1600 کەس گیانیان لەدەستداوە.
ئاژانسەکان دەڵێن لە تورکیا نزیکەی 6 هەزار باڵەخانە ڕووخاوە.
لە سلێمانی هەڵمەتێکی هاوکاری کۆکردنەوە بۆ زیان لێکەوتووانی بوومەرزەکەی تورکیا و سوریا لە ژێر ناوی " هاوخەمتانین" بەڕێوە دەچێت.
پەیامنێرمان سنور کەریم لە ئەمنە سورەکەی سلێمانی سلێمانییەوە دەڵێت ژمارەیەکی زۆر لە هاووڵاتیان لە هەموو چین و توێژەکان بەشدارن لەم هەڵمەتەدا و دەستی هاوکاری درێژدەکەن بۆ لێقەوماوان.
کارمەندانی کەمپەینەکە بە دەنگی ئەمەریکایان ڕاگەیاندووە بەشێکی زۆری کەرەستەکانی کە دەبەخشرێن بریتین لە خۆراک و بەتانی و ڕاخەر.
عەبدولفەتاح ئەلسیسی سەرۆکی میسڕ، ڕۆژی سێشەممە پەیوەندییەکی تەلەفۆنی لەگەڵ بەشار ئەسەد، سەرۆکی سوریا ئەنجام دا و پرسە و سەرەخۆشی خۆی دەربڕی بۆ قوربانییانی بومەلەرزەکە. وتوشیەتی میسڕ هەرچی لە توانایدابێت بۆ پێشکەشکردنی یارمەتی دەیکات.
سەرچاوە/ میدیا فەرمییەکانی میسڕ
پاش دەربازبوونی ڕۆژێک بەسەر بوومەلەرزە بەهێزەکەی تورکیا هێشتا هاوکارییەکان بەتەواوەتی نەگەیشتوون بۆ هەوڵی ڕزگارکردنی زیندووماوان لە ژێر داروپەردوی باڵەخانە ڕووخاوەکاندا.
پایەمنێرمان خەجیجان فەرقین لە ناوچەیەکی ئامادەوە باس لەو زیانانە دەکات کە بە تایبەتی بە شاری ئامادە بەهۆی بوومەلەرزەکەوە کەوتووەتەوە.
پەیامنێری دەنگی ئەمەریکا عومەر باران لەگوندێکی سەر بە شارۆچکەی سروجە و دەڵێت لە پاش بوومەلەرزەکە خەڵکی بەرەو گوندەکان دێن. ئەو لەگەڵ چەند هاووڵاتیەک قسەی کردووە کە ڕوویان کردووەتە گوندەکەو باس لە ڕەوشی خۆیان دەکەن.