لە سلێمانی هەڵمەتێکی هاوکاری کۆکردنەوە بۆ زیان لێکەوتووانی بوومەرزەکەی تورکیا و سوریا لە ژێر ناوی " هاوخەمتانین" بەڕێوە دەچێت.
پەیامنێرمان سنور کەریم لە ئەمنە سورەکەی سلێمانی سلێمانییەوە دەڵێت ژمارەیەکی زۆر لە هاووڵاتیان لە هەموو چین و توێژەکان بەشدارن لەم هەڵمەتەدا و دەستی هاوکاری درێژدەکەن بۆ لێقەوماوان.
کارمەندانی کەمپەینەکە بە دەنگی ئەمەریکایان ڕاگەیاندووە بەشێکی زۆری کەرەستەکانی کە دەبەخشرێن بریتین لە خۆراک و بەتانی و ڕاخەر.
ژمارەی ئەو کەسانەی بەهۆی بوومەلەرزە بەهێزەکەی تورکیا و سوریاوە گیانیان لەدەستداوە گەیشتە زیاتر لە 5100 کەس. بە پێی دواین زانیاری ژمارەی کوژراوەکان لە تورکیا 3500 کەسی تێپەڕاند و لە سوریاش بەلایەنی کەم 1600 کەس گیانیان لەدەستداوە.
ئاژانسەکان دەڵێن لە تورکیا نزیکەی 6 هەزار باڵەخانە ڕووخاوە.
ڕۆژی سێشەممە ڕۆژێک پاش بوومەلەرزە بەهێزەکەی تورکیا و سوریا منداڵێکی ساوا بە زیندووی لە ژێر داروپەردوودا لە باکوری سوریا لەلایەن خزمەکانییەوە دەرهێنراوە. ئەو خزمەکانی دەڵێن منداڵەکە تازە لە دایک بووە و هیشتا وێڵاشەکەی پێوەبووە.
خەلیل ئەل سوعادی دەڵێت ئەو منداڵە ساوایە تەنها کەسە لە خێزانەکەی خۆی کە ڕزگاری بووە تەوای خێزانەکەی بەهۆی بوومەلەرزەکەوە لە شارۆچکەی جندرێسی ژێر دەسەڵاتی سەرهەڵداوانی سوریا گیانیان لەدەستداوە.
ئەمەش لە کاتێکدایە نەخۆشخانەکانی سوریا لە ڕۆژئاوای ئیدلیب پڕ بوون لە بریندارانی ئاکامی بومەلەرزەکە.
تیمەکانی فریاکەوتنی هێشتا ڕزگاربووان و بریندارانی ئاکامی بومەلەرزە بەهێزەکەی ڕۆژی دووشەممە دەگوازنەوە بۆ نەخۆشخانەیەک لە ڕۆژئاوای ئیدلبی ئەو وڵاتە. لە کاتێکدا بەپێی سەرچاوەکان هێشتا سەدان خێزان لە ژێر دارووپەردووی خانووە ڕووخاوەکاندا گیریان خواردووە.
هاوکات کارمەندانی فریاگوزاری بەردەوامن لە هەوڵەکانیان بۆ دەرهێنان و ڕزگارکردنی ئەو کەسانەن کە لە ژێر داروپەردووی بینا وێرانبووەکاندا گیریان خواردووە لە نزیک حەلەب لە سوریا.
وەزارەتی بەرگری ئەمەریکا (پەنتاگۆن) ئەمڕۆ دووشەممە بەیاننامەیەکی بڵاو کردەوە و تیایدا دەڵێت وەزیری بەرگری ئەمەریکا لۆید ئۆستن بە تەلەفۆن قسەی لەگەڵ وەزیری بەرگری تورکیا خڵوسی ئاکار کردووە و هاوخەمی خۆی بۆ تورکای دەربڕیوە پاش بوومەلەرزە وێرانکارەکەی (بەرەبەیانی ڕۆژی دووشەممە).
لە بەیاننامەکەی پەنتاگۆندا هاتووە وەزیری بەرگری " ئۆستن پشتیوانی ئەمەریکا بۆ هەوڵەکانی فریاگوزاری تورکیا دووپاتکردووتەوە و بەڵێنی هاوکاری بەردەوامی داوە لە کاتێکدا پێداویستییەکانی تورکیا دەردەکەون."
لەو وەڵامیشدا وەزیری بەرگری تورکیا " خڵوسی ئاکار سوپاسی ئۆستنی کردووە و جەختی لەوە کردەوە هاوکارییەکانی ئەمەریکا و تورکیای لە بنکەی ئاسمانی ئینجیرلیک کاریگەری ئەرێنی هەبووە لەسەر هەوڵەکانی فریاگوزاری.