وەزارەتی ناوخۆی ئێران ڕۆژی پێنجشەممە و ڕۆژێک پێش هەڵبژاردنەکان ڕایگەیاند، ئەمیرحوسێن قازیزادە- هاشمی، ئەوپەڕی پارێزگار، لە کێبڕکێکاندا بۆ سەرۆکایەتی ئێران کشاوەتەوە.
وەزارەتەکە لە بەیاننامەکەیدا دەڵێت قازیزادە- هاشمی ڕۆژی چوارشەممە "کشانەوەی خۆی بۆ وەزارەتی ناوخۆ ناردووە."
قازیزادە-هاشمی، جێگیر ئیبراهیم ڕەئیسی سەرۆک کۆماری پێشووی ئێران، کە لە مانگی پێنجدا بەهۆی کەوتنەخوارەوەی هێلیکۆپتەرێکەوە گیانی لەدەستدا، بەبێ ئەوەی پشتگیری لە کاندیدێکی دیاریکراو بکات کۆتایی بە هەڵمەتەکانی هەڵبژاردنی هێنا.
قازیزادە- هاشمی تەمەن 53 ساڵ، پزیشکە و لایەنگرێکی سەرسەختی حکومەتی ڕەئیسییە کە هاوکات وەک بەرپرسی دەزگای شەهیدان کاردەکات، کە ئەرکی پشتیوانیکردنی بنەماڵەی ئەو کەسانەیە، لە خزمەتی وڵاتەکەدا کوژراون.
لە هەڵبژاردنی سەرۆکایەتی ساڵی 2021دا کاندید بوو و 3.5%ی دەنگەکانی دەستەبەر کرد.
ئەمیرحوسێن قازیزادە- هاشمی
قازیزادە-هاشمی درەنگانی ڕۆژی چوارشەممە لە پۆستێکیدا لە تۆڕی کۆمەڵاتی ئێکس (تویتەر) ڕایگەیاند "بۆ پاراستنی یەکگرتوویی هێزەکانی شۆڕش" لە هەڵمەتەکانی هەڵبژاردنی دەکشێتەوە.
جێگری سەرۆک کۆمار لە پەیامەکەیدا داوای لە کاندیدەکان پارێزگار و ئەوپەڕی پارێزگارەکانی تر کرد کە ئەوانیش "ڕێکبکەون" لەسەر یەک کاندید بۆ پێشکەشکردنی بەرەیەکی یەکگرتوو.
کاندیدە پارێزگار و ئەوپەڕی پارێزگارەکانی تر بریتین لە محەمەد باقر قالیباف، سەرۆکی پەرلەمان و سەعید جەلیلی دانوستانکاری پێشووی بەرنامەی ناوکی و عەلیرەزا زەکانی سەرۆکی شارەوانی تاران و مستەفا پور محەمەدی سیاسەتمەداری دێرین.
مەسعود پێزشکیان تەنها کاندیدی ڕیفرۆرمستە و لەلایەن حەسەن ڕۆحانی سەرۆک کۆماری پێشووتری ئێرانەوە پشتیوانی لێکراوە.
سەرچاوە: فرانس پرێس