تورکیا بەردەوامە لە ناردنی هێزی زیاتری سەربازیی بۆ ناوچەکانی باکوری هەرێمی کوردستانی عێراق لە پارێزگای دهۆک، وەک دەگوترێت بە ئامانجی ئامادەکاریی بۆ هێرشێکی بەرفراوانی لەشکریی دژ بە بنکەکانی پارتی کرێکارانی کوردستان.
هەژموونی کۆماری ئیسلامی ئێران و جموجۆڵە لەشکرییەکانی تورکیا لە عێراقدا، دۆسێی سەروەریی عێراقیان خستۆتە ژێر پرسیار و گومانێکی زۆرەوە.
عەلی ئەلصاحب، سەرۆکی نێوەندی هەرێمیی بۆ توێژینەوە، دەڵێت "ئەو جموجۆڵە لەشکریانەی تورکیا لە باکوری عێراقدا، تەنها پێناسەی داگیرکردن و دەستدرێژیکردنە سەر خاک و سەروەریی عێراق هەڵدەگرێت و هیچی تر. دەبێت ئەم دەستدرێژی و داگیرکردنە ببێتە ئەرکی هەرە سەرەکیی حکومەت و هەروەهاش هەموو دامەزراوەکانی دەوڵەتی عێراقیش."
هەتا ئامادەکردنی ئەم ڕاپۆرتە، هەردوو دەسەڵات لە بەغدا و لە هەولێر، بێدەنگن لەسەر ئەو لەشکرکێشیانەی تورکیا لە ناوچەکانی پارێزگای دهۆک. ئەم بێدەنگییەش وەها لێکدراوەتەوە کە هەڵکردنی چرای سەوزە بۆ تورکیا.
گەورە دەسەڵاتدارانی ئانکەرە بیانوی بوونی پارتی کرێکارانی کوردستان بەکاردەهێنن بۆ کردە لەشکرییەکانیان لە هەرێمی کوردستانی عێراقدا. تورکیا و ئەمەریکا و یەکێتی ئەوروپا، پەکەکە بە ڕێکخراوێکی تێرۆریست ناودێر دەکەن.
بەڕێز ئەلصاحب، جەخت دەکاتەوە لەوەی "دەستدرێژییەکانی تورکیا نەک هەر بێڕێزیکردنە، بەڵکو سوکایەتی پێکردنی تەواوی دەوڵەتی عێراقە و هەموو بیانووەکان و لێکدانەوەکان بۆ ئەو داگیرکارییەی تورکیا جێی قایل بوون نین. بێدەنگیی دەسەڵاتدارانی عێراقی لەوەی لە باکوری وڵاتەکە ڕوودەدات و هەروەهاش لەبەرامبەر هەژموونی کۆماری ئیسلامی ئێران، بریتییە لە ئاگاهیدانی ڕوودانی کارەساتێک و کۆتاییهاتن بە دەوڵەتێکی دێرینی وەک عێراق. ئێستاش تەواوی هاووڵاتیانی عێراقی بەبێ ڕەچاوکردنی پاشخانی نەژادی و ئاینییان، دەپرسن، مانا و لێکدانەوەکان چیین بۆ ئەو بێدەنگییەی دەسەڵاتدارانی عێراقیی، کە ڕێک وەک بێدەنگیی ناو گۆڕەکانە!. ئایا هێشتاش عێراق وەها لە تورکیا دەڕوانێت کە ئیمپراتۆرییەتی عوسمانلییە و ناتوانین لەبەردەم سوڵتانەکانیدا، نە چاو هەڵبڕین و نە دەنگیش بەرز بکەینەوە؟!"
سەیف ڕەعد طالب، پسپۆڕێکی ئاسایشی عێراقییە و لەوبڕوایەدایە "ئەم بێدەنگییەی هەردوو حکومەتی نێوەندی و هەرێمیش، بێدەنگییەکی ڕێککەوتن لەسەر کراوە و هۆکارەکەیشی دەگەڕێتەوە بۆ ئاڵۆزیی بابەتەکان لە ناوخۆدا و ئەم ئاڵۆزییەش بەهۆی دابەشبوونە سیاسییەکانەوەیە؛ ئەگەر بە قوڵیی سەیری ئەم بابەتە بکەین ئەوا دەبینین لەناو ڕێبەرایەتی کورد و هەروەها شیعەکانیشدا پشتیوانی هەن بۆ پارتی کرێکارانی کوردستان، هەرچەندە ئەو لایەنانە لەژێر چەتری دەوڵەتی عێراقدان و بەشداریشن لە حکومەتدا، ئەمەش یانی هەندێک لایەن هەن پێچەوانەی خواستی حکومەت هەنگاو دەنێن و ئەوانەش زیاتر نوێنەرایەتی پڕۆژەی ئێران دەکەن لە عێراقدا."
هاوکاتی سەردانەکەی ڕەجەب تەیب ئەردۆغان، سەرۆکی تورکیا بۆ بەغدا، حکومەتی عێراق دانینەنا بەوەی پەکەکە ڕێکخراوێکی تێرۆریستییە، تەنها ئەوەندە نەبێت بە ڕێکخراوێکی قەدەغەکراو ناودێری کرد.
سەیف ڕەعد طالب، دەڵێت "لەم دابەشبوونانەی لە ناو ماڵی کورد و ناو ماڵی شیعە و ناو ماڵی سوننەشدا هەن، ئیتر لەناو سیستەمی فەرمانڕەوایەتیدا ناتوانیت بگەیتە بڕیارێکی سیاسیانە کە شییانی دانوستاندن بکاتەوە لەگەڵ کۆماری تورکیادا یان فشار بخرێتە سەر ئانکەرە؛ ئەمەش بیانوو دەداتە دەست تورکەکان بۆ لەشکرکێشییەکانیان، بەتایبەتیش پاش ئەو پڕ چەک کردنەی پەکەکە، چونکە ئەوە یەکەم جارە دەبینین پەکەکە فڕۆکەی بێفڕۆکەوانی هەیە بۆ هێرشکردن و هەروەها جۆرێکی نوێی موشەکی هەیە بۆ تێکشکاندنی فڕۆکە بێفڕۆکەوانەکانی تورکیا؛ بێگومان ئەمەش وەهای کردووە تورکیا هەموو ڕێگەیەک بەکاربهێنێت بۆ لەناوبردنی پارتی کرێکارانی کوردستان."
عەلی ئەلصاحب، ئاماژەش بەوە دەکات هەندێک زانیاریی نیمچە پشتڕاستکراوە هەن لەسەر پێکهاتەی هێزەکانی تورکیا لە عێراقدا و دەڵێت "زیاتر لە 400 چەکداری ڕێکخراوە تێرۆریستییەکەی داعشی مرۆڤ کوژ لەناو ئەو سەربازانەی تورکیادان کە نێردراون بۆ ناوچەکانی باکوری هەرێمی کوردستانی عێراق."
زاگرۆس هیوا، وتەبێژی کۆما جڤاکێن کوردستان، کەجەکە، پێشتر بە دەنگی ئەمەریکای ڕاگەیاند، " تورکیا لەگەڵ هێزەکانی خۆی ژمارەیەکی زۆری لە گروپە جیهادیەکان هێناوەتە هەرێمی کوردستان، ئەو هێزە ڕادیکاڵانەی کە لە ئیدلیب و عەفرین و سەرێکانی و گرێ سپی دا جێگیر کراون و هەموویان پێشینەی داعش و بەرەی نوسرەیان هەیە."
بەڕێز ئەلصاحب، ئاماژە بە بەندە سەرەکییەکانی دەستوری عێراق دەکات و دەپرسێت "ئایا بوونی هێزی داگیرکەری بیانی لە عێراقدا بە پێشێلکردنی سەروەریی و شکۆی عێراقییەکان دانانرێت؟! ئایا عێراق وەک دەگوترێت کە خاوەنی پێگەی سیاسی و دیپلۆماتیی خۆیەتی، ناتوانێت تەنانەت لە سەکۆ نێونەتەوەییەکانیشدا وەک ئەنجومەنی ئاسایشی یو ئێن و ئەنجومەنی گشتی نەتەوە یەکگرتووەکان و دادگای لاهای، سەرکۆنەی داگیرکارییەکانی تورکیا و دەستێوەردانەکانی ئێران بکات؟!"
بەڕێز ڕەعد طالب، نکوڵی ناکات لەوەی وەک دەڵێت "بێگومان جموجۆڵە لەشکرییەکانی تورکیا لەسەر سنور و چوونە ناوەوەی بۆ ناو پارێزگای دهۆک لە ناوچەکانی ئامێدییەوە، بریتیین لە دەستێوەردانێکی بێ چەندوچوون و ئەوەی بەسەر گوندەکان و هاووڵاتیانی ئەو ناوچانەدا دێت، بە دڵنیاییەوە دژی هەموو ڕێککەوتن و پەیماننامە نێونەتەوەییەکان و مرۆییەکانیشن، ئەوە پێشێلکردنی سەروەریی عێراق و هەموو پەیماننامە نێونەتەوەییەکانیشە."
وەزارەتەکانی ناوخۆ لە بەغدا و لە هەولێر، هەر لەم هەفتەیەدا بوو ڕایانگەیاند تۆڕێکی سەر بە پارتی کرێکارانی کوردستان بەرپرسیارە لە ئاوردانی هەندێک شوێن لە پارێزگاکانی هەرێمی کوردستان و لە کەرکوک.
سەیف ڕەعد طالب پێیوایە " دانپێدانانەکانی ئەو تۆڕە بۆ کاری زیاتری تێکدەرانە لە بەغدا و شوێنەکانی تری عێراقیشدا، بەتایبەتیش بۆ سەر شوێنە ئابورییەکان، "ئاماژەن بەوەی پەکەکە، پڕۆژەیەکی هەیە و ئەو پڕۆژەیە ئاسایشی نیشتمانی عێراق بە ئامانج دەگرێت، هەربۆیە لەسەر حکومەتی عێراقە بە ڕێکخراوێکی تێرۆریست ناودێری بکات چونکە ئاسایشی ناوخۆ و نیشتمانی عێراق بە ئامانج دەگرێت."
دوابەدوای ڕاگەیەندراوەکەی وەزارەتەکانی ناوخۆی عێراق و هەرێم، کۆما جڤاکێن کوردستان (کەجەکە) وەڵامی ڕاگەیەندراوەکانی دایەوە و ئەو کردەی ئاگر تێبەردانانەی بە "پلانی هاوبەشی نێوان تورکیا، دەزگای میت و پارتی دیموکراتی کوردستان،" ناودێری کرد.
لە ڕوونکردنەوەی کەجەکەدا هاتووە، " لەڕێگەی میدیاكانەوە زانیمان كە كۆمەڵێك جەنگاوەری پارتی كرێكارانی كوردستان (پەكەكە) تۆمەتباركراون بەوەی، كە هەندێك ئاگریان لە شارەكانی هەولێر و كەركوك و دهۆك كردووەتەوە، ئێمە ئەم تۆمەتە بێ بنەمایانە ڕەتدەكەینەوە، كە هەمووان دەزانن ئەم هێرشە لەلایەن دەزگای هەواڵگری توركیا (میت) و ڕێكخراوی هەواڵگریی پارتی دیموكراتی كوردستان (پاراستن)وە ئەنجام دراون."